我們的婚紗照 - 拍攝記 @希臘女神 Beauty Hera

昨天終於影左我人生第一輯亦可能係最後一輯婚紗相，感覺都幾好玩，不過由朝玩到晚，都幾疲倦 (可能平日無做運動鍛鍊身體)。

8:45am 到達 Beauty Hera，因為未夠鐘，所以未開門。到 9am，有職員返工喇。

等左一陣，就開始化妝，幫我化妝的 MUA 叫 Cathy，個妝都化得唔錯。Cathy 首先幫我 final fit 將會出外景的2套衫，發現比較鬆，她就叫裁縫幫我改到 fit size。換好衫&化妝後，她便替我男友 J 先生 (係度第一次正式介紹他的名字) 化妝 & gel 頭。出外景時，她常常替我們補妝。總括來說她都很細心。

昨天幫我們影相的攝影師是亞康及他的助手Sunny，他們都很年輕而且很有趣，面對不懂擺 pose 及動作生硬的我們，他們很有耐性。

首先是在影樓 (室內+室外小花園) 影相，估不到小小的影樓都可以有8個景可以影。之後 2:45pm 就出發去馬灣了。到達馬灣後，還沒有其他新人影相，我們先在馬灣公園影，影了幾個景後，開始有幾對新人到達，好彩我們早左少少到，不用排隊影。影完沙灘景後，攝影師帶我們到馬灣的已荒廢漁村及碼頭影夕陽，這個景是我們 unexpected 的。到了6:30pm，我們就出發去 TST 1881 Heritage 及鐘樓影夜景。大約 8:15pm 就完成整天的行程，返去 Beauty Hera 換衫，8:45pm 離開。

很期待睇相....因為我們想係假日睇相，所以要 book 到 6月26日才可以睇。

另外，我想提一提..... 上次試衫時 (相關閱讀: 我們的婚紗照 - 試衫記 @希臘女神 Beauty Hera )，個sales 說我 有 2套衫要駁布先著到，但原來根本可以改到o岩 size，我諗這個sales 真是無乜經驗。

昨天偷影左我的 4個造型，相片會 post 係下一篇私友化的 blog。  (相關閱讀: 我們的婚紗照 - 拍攝記之偷影造型 @希臘女神 Beauty Hera (私友化) )

 

我們的婚紗照 - 試衫記 @希臘女神 Beauty Hera

終於去左希臘女神揀今個月尾影pre-wedding穿的禮服喇.....我們join的攝影plan包 2套WG + 2套EG + 3套男禮。今次係我咁大個女第一次試婚紗~~~不過偷影唔到，個sales話她的老闆娘係度。

好唔開心，無諗過原來咁難先揀到衫~~~

由於貓豬女的身材圓潤，肥肥地，當日試頭2套婚紗已經唔o岩身，大件事....係要駁布先得個種。個sales同我講，話我選的衫，大多數都係無乜紙口可以改大，差不多件件都唔o岩著....但唔知點解個sales仲要我試晒我自己選的衫....由最初懷著興奮的心情試衫，慢慢就愈來愈灰....後來我同個sales講，"不如你找一些你認為我o岩著的款俾我喇...." 加上我的friends同我一齊係間shop度搜索多d衫試....那天一共試左 over 20件，試左 3 hours.....

最後的結果係.... 1套拖尾WG + 1套EG (桃紅色) for 影樓景，因為兩件都要駁布，即係唔可以影背面..... 另外 1套WG 係馬灣影日景 + 1套EG (幻彩墨綠) 係TST 1881 Heritage影夜景....呢兩件合身....

關於Beauty Hera 的 services..... 暫時覺得幫我們試衫的sales服務麻麻地....
(1) 試衫前，個sales無睇清楚張單，以為得2套男禮，我們提佢她才知道
(2) 我睇相簿選款式時揀左好多款，原來好多款都係俾人租左，但個sales一開始無話俾我知，我差不多試完才知道
(3) 個sales唔知係咪覺得我試得太多衫(我都唔想，不過真係好多件都著唔到)，好似唔係好願意幫我搵衫

P.S. 一直都好懶，無決心keep fit，都唔期望輯婚紗相會好靚.....依家要努力d，希望big day時可以修到身.....另外，我要快d去尋找big day當日著的 WG & EG 喇，好驚搵唔到o岩著的衫.... 

我的 pre-wedding 絲花花球 by K's Floral Wedding - 收貨喇~~

收貨喇~~ 同大家分享~~

這就是我的絲花花球，顏色很甜美啊！

我的結婚首飾- 珍珠頸鏈 & 耳環

一直都有留意其他新娘子在穿婚紗行禮時配戴什麼首飾......最後都是比較喜歡珍珠頸鏈配襯婚紗，覺得比較優雅。

之前係連卡佛睇到個間日本田崎珍珠賣的珍珠真是好靚，不過真是很貴，要5位數字。

直到上星期行街，無意中遇到我喜愛的11-12mm珍珠頸鏈。舖頭的老闆娘話呢條頸鏈是來自大陸海南的天然養珠，她說把兩粒珍珠互相摩擦，如果是真珍珠就會產生一些粉末，抺走粉末後，珍珠的表面是不會弄花的。

老闆娘說近距離看這條珍珠頸鏈就會見到表面並不是十分光滑，而且不是每粒大細一樣。不過戴來影相就看不出瑕疵。一分錢一分貨，所以這套首飾價錢不算貴。

依家諗緊除了big day那天戴，也可能會戴來影 pre-wedding。


P.S. 多謝我的另一半！

尋找 pre-wedding 絲花花球

5月尾就要影 pre-wedding photos了，最初都有諗過買鮮花花球來影相，不過諗諗下都係怕太重，而且又怕大半天都在外面，鮮花缺水會好快凋謝，最後都係決定訂一個絲花花球帶去影相。

去過花墟睇，又上網尋找，找了很久也找不到合心意的。後來，我的同事幫我 search 了這間 Ｋ's Floral Wedding，一看之下，好靚喎，係我喜歡的款式。跟住就立刻 send e-mail 問價錢及訂製所需的時間。好彩緊緊趕到，可以係 5月中交收。老闆娘 Kitten 還可以按照我喜愛的花種類 & 顏色，幫我設計款式。很期待啊！

收到貨後再同大家 share。

我的結婚鞋

早在 3月尾就已經訂購了我的結婚鞋，因為想影 pre-wedding & my big day 時著。

我是係金都 G/F 的心意鞋店訂製的，需時 2個星期。呢間店係我的姨姨介紹的，她說廿年前結婚也是在這間店訂鞋，穿著了整天也沒有腳痛。

我選擇了銀色絹面，因為容易配襯，穿婚紗 & 晚裝都 OK。

去拎鞋時，老闆娘知道我要著這對鞋去影 pre-wedding 外景，她提醒我因為係絹面的關係，如果要行落沙灘或者行草地，就要小心點，因為如果弄髒了就抺不掉。

我依家準備買多對平平地的鞋帶去影 pre-wedding。